Dagen podkast: set sluttstrek.Er ei tid for
alt
ULEST: Vertane for Dagen-podkasten Ulest. F. v.:
Tore Hjalmar Sævik (Dagen-journalist), William Grosås (teolog og høgskulelektor
ved NLA) og Peder Solberg (teolog, kyrkjehistorikar og fyrstelektor ved
NLA).Foto: Bjørn Olav Hammerstad
Etter
halvtanna år med jamleg produksojn av episodar har podkasten Ulest kome til
vegs ende. - Ikkje utelukka at me kjem attende med meir, seier Dagen-journalist
Tore Hjalmar Sævik.
Gunnhild LønningJournalist
Publisert 27.06.25 - 19:00
Del på FacebookDel på TwitterDel på e-post
I tidsrommet november 2023 til juni 2025 har titals Ulest-episodar
vorte spelte inn av den historie-interesserte Dagen-journalisten Tore Hjalmar
Sævik saman med NLA-lektorane William Grosås og Peder Solberg.
No har produksjonen kome til vegs ende - enn så lenge. Den siste
episoden vart publisert for eit par dagar sidan.
- Det er jo litt vemodig, men det er ei tid for alt, seier Tore Hjalmar
Sævik, som skildrar arbeidet med Ulest som gjevande, lærerikt og fascinerande.
Òg Dagens reportasjeleiar Eivind Algrøy uttrykkjer eit visst vemod over
endestasjonen.
Eivind Algrøy,
Reportasjeleiar i Dagen
– Ulest har verkeleg vore eit fellesprosjekt, der Peder og William sin
akademiske kompetanse og Tore Hjalmar si journalistiske nyfikne vart ein
perfekt «match». Evna til å gje seg på topp er det ikkje alle som har. Denne
podkasten vil me sakna.
«Ulest» - kristne klassikarar
Podkast som
utforskar tekstar frå kvart hundreår av kyrkja si historie.
Produsert i
samarbeid mellom NLA Høgskolen og Dagen.
Teologane
Peder Solberg og William Grosås samtalar med journalist Tore Hjalmar Sævik.
Alle episodane
er fritt tilgjengelege på Spotify, Apple podkast og andre plattformer som
formidlar podkast.
Sævik, Solberg
og Grosås utforskar to tekstar frå kvart hundreår, men har òg utgjeve ein del
bonusepisodar. Totalen er 73 episodar.
Djupdykk i kykjehistoria
Gjennom 73 episodar losar podkast-trioen lyttarane gjennom to
kyrkjehistoriske tekstar frå kvart hundreår sidan Jesu fødsel.
Mellom anna har dei kontekstualisert tekstane og diskutert kva for ei
tyding dei har hatt for både samtida og ettertida.
FORSTÅING: Arbeidet med dei kyrkjehistoriske tekstane har gjeve Tore
Hjalmar ei breiare forståing av dei tidlege kristne sitt liv og virke.Foto:
Tarjei Gilje
Det er særleg den konstante aktualiteten til tekstane som har fascinert
Sævik, men òg det faktum at det er enkelt å kjenna seg att i kyrkjefedrane -
trass i at dei ytre omstenda har endra seg drastisk gjennom hundreåra.
- Det har vore både spanande og lærerikt å oppdaga det havet som finst
av kristen litteratur, og det at Gud er den same og menneska dei same, uansett
kva for ei tid ein lever i. Ein har mykje å læra av dei som levde før oss og
meir til felles enn ein skulle tru.
Til oppbygging
Bak tittelen Ulest løyner det seg eit mål om å gjera ukjende, og
moglegvis ulesne, tekstar tilgjengelege for folk flest, uansett
føresetnader.
Men det stoppar ikkje der. Ein vesentleg del av motivasjonen bak serien
har nemleg vore å styrkja kristne i truslivet.
- Ynsket har vore å laga ein oppbyggjeleg serie. Me har hatt eit mål om
å ta lyttarane med på ei kyrkjehistorisk oppdagingsreise på ein måte som er
nærande for trua, seier Sævik.
TEOLOGAR: William Grosås og Peder Solberg er teologar og høvesvis
høgskulelektor og fyrstelektor ved NLA i Bergen. Dei tok initiativ til Ulest og
ville gjerne få til eit samarbeid med Dagen.Foto: Bjørn Olav Hammerstad
Til gjengjeld har responsen vore overstrøymande positiv.
- Fleire har sagt at dei har opplevd serien som lærerik og fornyande,
fordi ein får ein type kjennskap til den kristne arven som ein gjerne ikkje
hadde, held Sævik fram.
Òg reportasjeleiar Algrøy gjev podkast-serien varme skotsmål.
– Ulest har utforska kyrkjehistoria på ein fagleg sterk og
underhaldande måte. Det har hatt stor verdi for både publikum og oss som avis.
Kjem truleg attende
No vender både Sævik og Algrøy blikket sitt framover, men
Dagen-lesarane- og lyttarane treng ikkje fortvila.
- Det er alltid meir å oppdaga. Den kristne tradisjonen er rik og
vidfemnande, seier Sævik og understrekar at ein ny sesong av Ulest ikkje er
utelukka.
Algrøy gjev uttrykk for det same, utan å gje for sterke lovnader.
Han kan likevel meddela at nokre spanande podkastprosjekt er under
utvikling,- mellom dei eit litterært.
- Så det kjem meir ljod frå Tore Hjalmar og andre her i Dagen, det er
sikkert.
podkast ulest dagen tore hjalmar sævik nyheter kyrkjehistorie